वर्धा प्रतिनिधी, महाराष्ट्र दणका
वर्धा जिल्ह्यात राष्ट्रवादी काँग्रेस पार्टीच्या अजित पवार गटाच्या कार्यपद्धतीवर गंभीर प्रश्नचिन्ह निर्माण झाले असून, संघटनेतील निष्क्रियता, अंतर्गत मतभेद आणि नेतृत्वावर नाराजी यामुळे पक्षाची स्थिती दिवसेंदिवस ढासळत असल्याचे चित्र समोर येत आहे. जिल्हाध्यक्ष शरद शहारे यांच्या नेतृत्वावरही अनेक कार्यकर्ते आणि पदाधिकाऱ्यांनी उघडपणे नाराजी व्यक्त केली आहे.
मिळालेल्या माहितीनुसार, गेल्या वर्षभरात जिल्ह्यात पक्षाच्या कोणत्याही महत्त्वाच्या बैठका झालेल्या नाहीत. तसेच, वरिष्ठ नेत्यांचे दौरे, कार्यकर्त्यांशी संवाद किंवा संघटन मजबूत करण्यासाठी कोणतीही ठोस कृती झालेली नसल्याची तक्रार पदाधिकाऱ्यांकडून होत आहे. “नेते गेले कुठे?” असा सवाल अनेक कार्यकर्ते उपस्थित करत असून, पक्षातील संवाद पूर्णपणे खंडित झाल्याचे दिसून येते.
संघटनेत दोन गट; संघर्ष तीव्र
जिल्ह्यात झालेल्या नगरपरिषदेच्या निवडणुकीनंतर पक्षात अंतर्गत फूट अधिकच स्पष्ट झाली आहे. अध्यक्षांच्या नेतृत्वावर असमाधानी असलेले काही पदाधिकारी आणि कार्यकर्ते एका बाजूला, तर अध्यक्ष समर्थक दुसऱ्या बाजूला असे दोन गट तयार झाल्याचे स्पष्टपणे दिसून येत आहे. या गटबाजीमुळे पक्षाची एकजूट ढासळली असून, संघटनात्मक कामकाजावर त्याचा मोठा परिणाम झाला आहे.
कार्यकर्त्यांचा भाजप व काँग्रेसकडे कल
जिल्ह्यातील अनेक कार्यकर्ते आणि पदाधिकारी पक्ष सोडून इतर पक्षांकडे वळत असल्याची गंभीर बाब समोर आली आहे. विशेषतः काही कार्यकर्ते भाजप आणि काँग्रेसमध्ये प्रवेश करण्याच्या तयारीत असल्याचे सांगितले जाते. त्यामुळे जिल्ह्यात अजित पवार गटाचा प्रभाव कमी होत चालला असून, पक्ष पूर्णपणे संपुष्टात येण्याच्या स्थितीत असल्याची चर्चा राजकीय वर्तुळात रंगत आहे.
निवडणुकीनंतर कोणतेही नियोजन नाही
नगरपरिषदेच्या निवडणुकीनंतर पक्षाकडून कोणतीही संघटनात्मक बैठक, कार्यक्रम किंवा पुढील रणनीती ठरविण्याचा प्रयत्न झालेला नाही. जिल्ह्यातील सहा नगरपरिषद निवडणुकांनंतर पक्षाने कार्यकर्त्यांना एकत्र करण्यासाठी किंवा पराभवाचे विश्लेषण करण्यासाठीही कोणतीही बैठक घेतली नाही, ही बाब विशेषतः लक्षवेधी ठरत आहे.
आर्थिक गैरप्रकारांच्या आरोपांनी खळबळ
नगर परिषद निवडणुकीदरम्यान पक्षाकडून उमेदवारांना दिल्या जाणाऱ्या आर्थिक मदतीत मोठ्या प्रमाणावर गैरप्रकार झाल्याचे आरोप काही कार्यकर्त्यांनी केले आहेत. अध्यक्षांनी पक्षाकडून आलेल्या निधीपैकी मोठा हिस्सा स्वतःकडे ठेवून उमेदवारांना अपुरी रक्कम दिल्याचा आरोप करण्यात येत आहे. या आर्थिक गैरव्यवहारामुळे अनेक उमेदवारांना योग्य प्रकारे निवडणूक लढवता आली नाही आणि परिणामी पक्षाला पराभव पत्करावा लागल्याचे सांगितले जात आहे.
पदाधिकाऱ्यांकडून आलिशान गाड्यांची खरेदी?
काही वरिष्ठ पदाधिकाऱ्यांनी निवडणुकीनंतर महागड्या गाड्या खरेदी केल्याची चर्चा कार्यकर्त्यांमध्ये सुरू आहे. या गाड्या पक्षाच्या निधीतून घेतल्या गेल्याचा आरोपही करण्यात येत आहे. या सर्व प्रकारांमुळे पक्षाच्या प्रतिमेला मोठा धक्का बसला असून, कार्यकर्त्यांचा विश्वास ढळत चालला आहे.
नेतृत्वावर प्रश्नचिन्ह
जिल्हाध्यक्षांच्या नेतृत्वावरच प्रश्नचिन्ह उपस्थित होत असून, पक्षाची स्थिती दिवसेंदिवस खालावत चालल्याचे दिसून येत आहे. संघटनात्मक कामकाज ठप्प, कार्यकर्त्यांमध्ये नाराजी आणि आर्थिक गैरप्रकारांचे आरोप यामुळे पक्षाची विश्वासार्हता धोक्यात आली आहे.
पुढील वाटचाल अनिश्चित
सध्याच्या परिस्थितीत जिल्ह्यात अजित पवार गटाचे अस्तित्व टिकवणे हे मोठे आव्हान ठरत आहे. पक्ष नेतृत्वाने लवकरच ठोस पावले उचलली नाहीत, तर जिल्ह्यात पक्षाचा पूर्णपणे नायनाट होण्याची शक्यता वर्तवली जात आहे.
एकूणच, वर्धा जिल्ह्यात राष्ट्रवादी काँग्रेस (अजित पवार गट) अंतर्गत संघर्ष, निष्क्रियता आणि आरोपांच्या भोवऱ्यात अडकली असून, पक्षाच्या भवितव्याबाबत गंभीर प्रश्न निर्माण झाले आहेत.